तमूधिं यूकेले आयोजना गर्ने ल्होछार कार्यक्रमका लागि ख्यातिप्राप्त लोक तथा दोहोरी गीतका कलाकारहरु चिज गुरुङ र भिमु गुरुङ बेलायत आउने पक्का भएको छ ।
२०२२ डिसेम्बर ३१ तारिखमा हुने ल्होछार/ल्होसार कार्यक्रमका लागि चर्चित गायक चिज र गायिका भिमु बेलायत आउने भिसा लागिसकेको तमुधिं यूकेले जनाएको छ । कार्यक्रम अल्डरसटस्थित एम्पायर हलमा बेलुकी ५ बजेदेखि हुने छ । तमुधिं यूकेले हरेक वर्ष नेपालबाट कलाकारहरु डाकेर ल्होछार कार्यक्रम भव्य रुपमा मनाउने गरेको छ ।
गत वर्ष गायिका पवित्रा गुरुङले तमुधिंको ल्होछार कार्यक्रममा सांगीतिक प्रस्तुति दिएकी थिइन् । यस वर्ष ल्होछार कार्यक्रमका लागि उपाध्यक्ष जुमकाजी गुरुङ संयोजक छन् । उनले कार्यक्रमको तयारी तीव्र रुपमा चलिरहेको बताएका छन् ।
ल्होछारका दिन बर्सेनि प्रकाशन हुने फ्रेंसी पत्रिका विमोचन, 'डा हर्क अवार्ड २०२२' वितरण, विभिन्न समुदायमा योगदान दिने व्यक्तिहरुलाई सम्मान, राफल ड्र, राष्ट्रिय र स्थानीय कलाकारको नृत्य, गायनजस्त विविध प्रस्तुति हुने तमुधिंले जनाएको छ ।
