बार्सिलोनाका लियोनल मेस्सीले विश्व फुटबलका महान खेलाडी पेलेको कीर्तिमान तोडेका छन् । उनले बार्सिलोनाबाट ६४४ गोल गरेर पेलेको कीर्तिमान तोडेका हुन् ।
मेस्सीले स्पेनिस ला लिगा फुटबल अन्तर्गत मंगलबार राति भएको खेलमा रियल भालाडोलिडलाई ३–० ले पराजित गर्ने क्रममा ६५ औँ मिनेटमा गोल गरेर कीर्तिमान बनाएका हुन् । मेस्सी एकै क्लबबाट सर्वाधिक गोल गर्ने खेलाडी बनेका छन् ।
सन् २००५ मा बार्सिलोनाबाट पहिलो गोल गरेका ३३ वर्षे मेस्सीले यो अवधिमा ६४४ गोलको सहयोगमा बार्सिलोनालाई १० पटक ‘ला लिगा’ तथा चार पटक ‘च्याम्पियन्स लिग’को उपाधि जिते ।
पेलेले सन् १९५६ देखि १९७४ सम्म १९ सिजनमा ब्राजिलियन क्लब सान्तोसका लागि ६४३ गोल गरेर कीर्तिमान बनाएका थिए । गएराति भएको खेलमा रियल भालाडोलिडलाई पराजित गर्ने क्रममा मेस्सीसहित २१ औँ मिनेटमा क्लेमेन्ट लेंग्लेट तथा ३५ औँ मिनेटमा मार्टिन ब्रेथवेटले गोल गरे ।
जितपछि पाँचौँ स्थानको बार्सिलोनाको १४ खेलबाट २४ अंक भएको छ । रेलिगेशन जोनमा रहेको रियल भालाडोलिडको १५ खेलबाट १४ अंक सुरक्षित छ ।
