काठमाडौं – सत्तारुढ दल नेपाली कांग्रेसको १४औं महाधिवेशनको चटारोबीच युवा र महिलाले एकपछि अर्काे कीर्तिमान बनाइरहेका छन् ।
दैलेख जिल्लाको दुल्लु नगरपालिका–३ को सभापतिमा १९ वर्षिया स्वस्तिका महत चयन भएपछि देशभर उनको चर्चा भयो ।
यसैबीच, गोरखा जिल्लाको भीमसेन थापा गाउँपालिका वडा नम्बर १ बाट सर्वसम्मत रूपमा क्षेत्रीय प्रतिनिधिमा निर्वाचित भएकी २० वर्षीया शोभा बस्ताकोटी असोज १२ गते भएको गोरखा क्षेत्र नम्बर १(२) को क्षेत्रीय अधिवेशनबाट गण्डकी प्रदेश अधिवेशन प्रतिनिधिमा निर्वाचित भएकी छन् ।
प्रदेश अधिवेशनसम्मको यात्रा तय गर्ने पहिलो कान्छी महिला बनेकी छन् शोभा ।
नेत्री शोभा पार्टीले आयोजना गरेका हरेक कार्यक्रम र आन्दोलनमा सहभागी हुँदै नेपाल विद्यार्थी संघ (नेविसंघ) को राजनीतिमा सक्रिय रहेकी छन् ।
नेविसंघ भीमसेन थापा गाउँपालिकाको उपाध्यक्ष हुँदै गोरखा जिल्ला सदस्य भएकी शोभाले युवाले नै अब पार्टी र देशको नेतृत्व गर्नुपर्ने बताउँदै प्रदेश प्रतिनिधि भएको बताएकी छन् ।
