काठमाडौं । लोकदोहोरी गायिका सुशिला गौतमले ‘एक नजर लाइदेउन माया’ बोलको तीज गीतको भिडियो ल्याएकी छन् । मंगलबार गायिका गौतमले आफ्नै युट्युब च्यानलमार्फत उक्त गीतको भिडियो सार्वजनिक गरेकी हुन् ।
उनलाई गायक पशुपति शर्माले आवाजमा साथ दिएका छन् । गीतको शब्द गायिका गौतम आफैले रचना गरेकी हुन् भने गायक शर्माले संगीत भरेका छन् । त्यसैगरी विनोद बाजुरालीले संगीत संयोजन गरेको गीतमा खडक बाजुरालीले मिक्सिङ गरेका छन् ।
मालाश्री स्टुडियोमा रेकर्ड गरिएको गीतलाई गोविन्द बाजुराली र सागर बाजुरालीले रेकर्ड गरेका हुन् भने राजेन्द्र बाजुरालीले स्वर सम्पादन गरेका छन् । त्यस्तै, गीतको भिडियोलाई स्मृति तिमल्सिना ‘गुरुआमा’ले निर्देशन गरेकी छन् ।
करन चैसिरले छायाँकन गरेको उक्त गीतको भिडियोलाई मनोज कार्कीले सम्पादन गरेका हुन् । त्यसैगरी गायिका सुशिला र गायक पशुपतिले नै गीतको भिडियोमा अभिनय गरेका छन् । आउँदै गरेको हिन्दू नारीहरुको महान् पर्व हरितालीका तीजकाे छेको पारेर गीतको भिडियो बजारमा ल्याएको गायिका गौतमले बताइन् ।
गायिका गौतमले विगतमा जस्तै यस गीतले पनि आम दर्शक स्रोताहरुको माया पाउनेमा आशा व्यक्त गरिन् । उनले आफ्नो र गायक शर्माको तीज गीतमा यो दोस्रो सहकार्य भएको सुनाउँदै ६ वर्षअघिको तीजमा आफू र गायक पशुपतिले ‘जवानीले ढुनुमुनु बनायो’ बोलको गीत ल्याएको बताइन् । त्यस्तै, गायिका गौतमले ‘भुइँ छोडेकी चरीलाई,’ ‘लेउ लायो’ लगायतका तीज गीतले चर्चा पाइसकेको जिकिर गरिन् ।
