काठमाडौँ । लोकदोहोरी गायिका दिलमाया सुनार मृत्यु प्रकरणले नयाँ रूप लिएको छ । शनिवार बिहान काठमाडौँको बानियाटार स्थित डेरामा सुनार मृत भेटिएकी थिइन् । उनको सामाजिक सञ्जालमा सुसाइड नोट समेत भेटिएको छ । तर, घाँटीको नीलडाम र घटनास्थलको प्रकृति हेर्दा उनको हत्या हुन सक्ने प्रहरीले आशङ्का गरेको छ ।
सुर्खेत माला रानी स्थायी घर भएकी सुनार एक दशकदेखि लोकदोहोरी गायनमा सक्रिय थिइन् । करिब ३० वर्षीया गायिका सुनारको मृत्यु प्रकरणमा प्रहरीले एक जनालाई पक्राउ गरेको छ ।
पक्राउ पर्नेमा सूर्य श्रेष्ठ रहेका छन् । श्रेष्ठ गायिका सुनारको प्रेमी भएको बताइएको छ। उनलाई अहिले हनुमानढोकामा राखेर प्रहरीले अनुसन्धान गरिरहेको प्रहरीले बताएको छ । प्रहरीका अनुसार श्रेष्ठ शनिवार बिहान २ बजे मृतक सुनारको डेरामा गएका थिए ।
घटना रहस्यमय भएको भन्दै प्रहरीले अनुसन्धान अघि बढाएको गायिका टिका पुनले जानकारी दिइन् । त्यस्तै, राष्ट्रिय लोक तथा दोहोरी गीत प्रतिष्ठान नेपालका उप – महासचिव शिव हमालले सत्य तथ्य तत्काल बाहिर ल्याउन आग्रह गरेको जानकारी दिए । उदयमान गायिका सुनारको मृत्यु प्रकरणले लोकदोहोरी क्षेत्र स्तब्ध बनेको छ ।
सुुनारकै घरबेटीसंग गरिएको यो बिशेष कुराकानी हेर्नुहोस्ः
